قصيده لشاعر الحرقان الشاعر / رثاء في والده عايض بن جبران

قصيده لشاعر الحرقان الشاعر /ذيب بن عايض بن غيدة

رثاء في والده
عايض بن جبران بن غيدة


-

أبدي بذكر الله واخزي الشياطين
رب الفلق من فوق خلقه رقيبي

يامالك الدنيا ويامالك الدين
ياسامع الدعوات يا مستجيبي

أنت القوي وحن الضعوف المساكين
وأنت الذي تعلم بسري وغيبي

أغفر ذنوبي عند وزن الموازين
وأنت الرجاء فيك الرجاء مايخيبي

ولا تواخذني على الجيم والسين
يمكن لساني في البحور يهويبي

أخاف من هرجٍ يزل القوانين
وأضيع المعنى ضياع الذهيبي

كم راميً يحفظ عيار النياشين
ويخطي الهدف مره ومره يصيبي

من أولٍ أبني وأرفع البيت دورين
واليوم كيف أبني ودمعي سكيبي

أخطيت درب الزين واصبرت لشين
وأمشي بهم وغيض ما يندريبي

ياكثر همً تحت عوج الظلاعين
وطواري في دربها تنتحيبي

تكفين يا دكتوره القلب تكفين
النار شبت في فوادي شبيبي

وين الطبيب اللي يداوي الجريحين
عطيني اسم عيادته وافزعيبي

مافادني دمع سكب فوق خدين
وزوداً عليها أون وأشق جيبي

ولا ودي أبكي تو عدو وحسودين
لا شك فاضت من عيوني غصيبي

ومن لامني جعله يفارق حبيبين
وتركب عليه خيول بقعا ركيبي

ياعين ياللي بالعباير تهلين
كفّي وعوذي من إبليس الغظيبي

من السهر عندي غدى الليل ليلين
والناس ترقد والهموم تغديبي

هني ناسٍ عقب الاحزان ناسين
والله ما أنسى عن حبيب لبيبي

وبحكم ربٍ كون الكون راضين
كثر التوجد والبكا ما يثيبي

شهر رمضان بعام سته وتسعين
أصوم وأفطر بالبكا والنحيبي

عشرين ليل ما وقف دامع العين
وأسباب دمع العين فرقا حبيبي

فارقت من حبه بدم الشراين
أبوي جعله في الجنان الرغيبي

يوم زل ثلث الليل ثم بقي ثلثين
قضى الامر مافاد طب الطبيبي

خبتوا وخاب علاجكم يالمداوين
علاجكم للزرع برد وضريبي

ياليت في قبره من عيالي اثنين
ويبقى معي لو كان عوداً هكيبي

لا ماتوا الورعين حصلت ورعين
مافيه مثل الجدي نجمً يغيبي

هرجٍ صحيح الله يصيب الكذوبين
ومن قال ذَا يكذب فربي حسيبي

والصدق له نور وهل الكذب خاسين
واللي كذب ملعون والكذب عيبي

يالله وسع قبره آمين و آمين
واجعل تراب القبر مسكً وطيبي

ونور بقبره نور من نورك الزين
واكتب له برحمتك حظ ونصيبي

ياللي تمر القبر سلم سلامين
وعن طلبة الله لا تجنب جنيبي

لا تقول مات وحال من دونه الطين
اذكر فعول القرم سقم الحريبي

محزم بني عمه وضد المعادين
وتعرف فعوله يوم سلب ونهيبي

في ماقف الشجعان والله ونعمين
وفي مجلس أهل العلم عارف وأديبي

يشهد بفعله الأجنبي والقريبين
حتى العذارى ناقضات الذويبي

حفرت قبره بين ربعً شجيعين
في مقبرة عرقه سقتها السحيبي

جعل المطر ينشي عليها اسبوعين
ويرد ليله كل قاعٍ عشيبي

بلادً حميناها بضرب أم تاجين
ومن دونها ناقف شباب وشيبي

وبفعولنا صارت غروس وبساتين
ونجلب ثمرها للعرين وطريبي

ولا جاء الزبون انكيل له فالمواعين
ونعطيه من تمر العذوق الرطيبي

ومن سب في عرقه نسميه بسمين
خلفة بني عمه وذيل العسيبي

ومن قال ذيب ً غاب عن بوه شهرين
أقول له كذاب وأكذب كذيبي

في خدمته نمشي خفافً وعجلين
ولا دعاني جيت عجلً خبيبي

لاهو بيجفانا ولاحن بعاصين
انبح وطول نبحتك يالكليبي

فالغر يرميني نسور وكراوين
وطاحت بنادقهم بممسى العزيبي

ناسً لعرقوب المقفي سكاكين
عسا مساكنهم بنار اللهيبي

واللي مريض أكويه في القلب كيين
عطه الجواب وخبره يا نديبي

ماطالعت عيني لفلم الكراتين
ولدقم سنونه ماتقطع سليبي

ومن يرصع الحيه تعضه بنابين
ويبطي وهو من سمها مستصيبي

ياللي تقربع بالتنك والجوالين
وتنفخ كما الكوره تراني لعيبي

فالملعب اشوتك برؤوس البياتين
والعاني الكذاب لا يعتنيبي

الأوله جاتك ورود ورياحين
والثانيه تكلك زاداً غبيبي

ياللي بكبدك جرح ضمد لكاوين
وأصبر على بلواك لا تبتليبي

قبل أكسرك من فوق ركبتك كسرين
وأثني عقالك لين تعتب عتيبي

وسقيك فالكنه معَ الهيم حوضين
وتموت وأنت بشربتك يالشريبي

الشرع طهرني بهدي النبيين
وثوب الجنابه فوق جسمك خضيبي

لاتكبر اللحيه ونيتك طبقين
ولا تحط الثوب فوق الكعيبي

واللي يصلي للمطوع صلاتين
اكتب على رأس المصلي صليبي

ترفعني علوم الرجال الرفيعين
ومسك الحبال الراخيه ترتخيبي

وصلت مراسيل الشيوخ المعزين
اللي بعيد ديار واللي قريبي

جاني من ال عجيب ربعً عزيزين
والجود من الاجواد ماهو غريبي

وزيارة الخمسه تجمل بخمسين
ويرقى الجبل من كان جده عجيبي

قبيلة آل عجيب سقم المعادين
عدوهم ينشب بشوك وزريبي

شجعان عراف ً قروم وكريمين
سباع بحزات الخطر ماتهيبي

وعندي على ما أقول ثبت وبراهين
وهرجٍ بدون ثبوت شمسه تغيبي

أمدح رجال في المواجيب وافين
يردون حوض الموت ورد القليبي

ومن الرياض التعزيه جات نوعين
وهديّةٍ ودّيةٍ من صحيبي

ارسل علي حامد خطوط وعناوين
واللي ذكر مافيه شكً وريبي

ورسايله تجبر عضام المصابين
وجده وأبوه مجبرين الصويبي

جذعان لا دارت رحا القوم قاسين
هم درعي الظافي خزام الطليبي

سعد الرفيق وللمعادي سلاطين
بيتً على ساسً جداره قطيبي

ياحامدً ياشوق سيد المزايين
اللي وصايفها تزيد تعذيبي

كن القمر في خدها قبل عشرين
نصف الشهر والعين عين القضيبي

عين هدبها فوق الاوجان صفين
تغضيبها بين الرموش الهديبي

تشكي علي من هرج ناسٍ غبيين
وبعض الهروج الحيل تصبح حصيبي

ورحبت برسالتك ترحيب غالين
ويلبس ثياب العز من يعتزيبي

وأنا عضيدك حزة اللعسر واللين
ذيبٍ يجر عواه مع كل ذيبي

ماهي بتأكلني جواع السراحين
ألوي بها قدام ما تلتويبي

ومن سب في الديوان يظهر دواوين
وإذا طلب منا جوابً نجيبي

أن كان من الأجناب حنا قحاطين
نرد العدود الصافيه والسريبي

وأن كان من الاقراب قلنا مجانين
وراعا المرض معذور حتى يطيبي

وخمسة وعشره ما تساوي ملايين
ولا سالت الوديان ضاع الشعيبي

واللي براسه حب يلقاء طواحين
ويصير في الاكياس برٍ صبيبي

وكثر العزاوي ماتفيد الضعيفين
والشق الأثلم مايجيبه حليبي

مايطلع التفاح في شجرة الكين
لو طالت غصونه وشكله عجيبي

واللاش في الإسلام يلبس حزامين
وتحمر عينه كن فيها زبيبي

تقول بن هدلان ولا بن حثلين
ولا ابن هادي والزعيم العتيبي

والديك مايوصل وكور الشياهين
لو جر في الأسحار صوت صليبي

والطيب عنك بعيد يابو دليقين
من دونه ذيابً تجر القنيبي

والمرجله ماهي بضحكة حجاجين
بنتً مهرها عجز عنه الخطيبي

والبنت ما تبغي قصير الذراعين
الله يعطب كل يمنىً عطيبي

تقول خلك بعيد وحنا بعيدين
لصرت طافي نار لا تشتقيبي

تريح وخل التعب وامش بهوين
رأس الجبل مرقاه عسر وصعيبي

وسط المجالس تجعل الصاع صاعين
وفي ساعة الشده ضلوعك حطيبي

عود لممسى أبوك وسط المعاطين
ولا تروح بعيد خلك ربيبي

والمدح ما يرفع مقام الرديين
وبيتً بلا ساسً يطيح ويسيبي

كم واحدً يذبح كباش وبعارين
وضيفه يجي ويروح جوعه رهيبي

والضيف له حقً وللجار حقيين
يدري بها من كان جده عريبي

وجاراً يبي فرقاي فرقاه عيدين
خله يروح بعيد ثم يحكيبي

من باعني بريال بعته بقرشين
واشريه بالماء قبل ما يشتريبي

وبالصنفره ماني مصنفر كرابين
لاهو بابن عماً ولاهو نسيبي

والسالفه فيها بنوك ودكاكين
أحد زعل مني وأحد يرتضيبي

والكامل الله يالرجال الفهيمين
الدرب قدامي طويل وتعيبي

يتعبني المحراف لازل سبعين
وأنا اقتدي بأشعار من يقتديبي

والشعر له فرسان حربً قويين
طافوني وعدو برأس الجذيبي

وانا اعتبر نفسي بحلقة الاخرين
واحب ذوق الماء القراح العذيبي

والشعر سوق ً فيه بايع وشارين
وقليل من يربح ويكسب كسيبي

شعراً وراثه من جدود قديمين
وشعر يجي من عند ربي وهيبي

والشعر غنابه كبار وصغيرين
مثل الديار بها سهول وهضيبي

واشوف شعارً عن الدرب غاوين
ورجلي على طاروقهم ما تجيبي

شعار واجد بظلم الليل سارين
مثل النمل في الأرض يدبي دبيبي

ياليتهم عن شعرهم مستريحين
من صاح برضً خلو ماله مجيبي

وصلو على سيد العباد المصلين
ما يقرأ القاري ويكتب كتيبي